O alcalde compostelán, Xerardo Conde Roa, e o concelleiro de Mobilidade e Tráfico, Albino Vázquez, visitaron a nova área de servizo para autocaravanas do aparcadoiro de borde de Salgueiriños.
Neste espazo, ademais de aparcar o vehículo, os usuarios poden abastecerse de auga e eliminar as augas residuais.
Ata agora, as autocaravanas podían estacionar no aparcadoiro de borde de Salgueiriños, pero non dispoñían de ningún outro tipo de servizo.
Por este motivo, realizouse no estacionamento un espazo de formigón liso e conectado á rede de sumidoiros onde a autocaravana pode realizar as seguintes tarefas de mantemento:
Encher o depósito de auga potable
Baleirar o depósito de "augas grises"
Baleirar o depósito de "augas negras"
O investimento da obra ascendeu a 12.000 € máis o IVE e o custo do servizo para os usuarios de caravanas que fagan uso da instalación ascende a 3 €.
