Debemos ter en conta que o Concello de Santiago está en pleno proceso de licitación do PMUS (plan de mobilidade sostible), que a bo seguro adecuará a nosa rede de transporte ás distintas transformacións que se están a facer na cidade.
Lembramos que agora mesmo estase a traballar na instalación do novo SAE (sistema de axuda á explotación) e 12 novos postes informativos.
Para coñecer toda a información poden consultar a nosa páxina web www.tussa.org. Ademais editaranse 30.000 folletos informativos que estarán a disposición dos usuarios a partir desta mesma semana nos propios autobuses, nas oficinas de TUSSA, na estación de autobuses, na oficina de Atención ao Cidadán e na casa das Asociacións.
Así mesmo, nos vindeiros días e nas zonas que teñan algunha modificación, resaltaranse os cambios nas marquesiñas do transporte urbano das zonas implicadas nos cambios.
Por último lembrar que a empresa operadora Tralusa pon á súa disposición o teléfono 901 120 054 os 365 días do ano no horario de funcionamento do servizo, teléfono no que lles poderán informar de horarios, rutas e tempo estimado de espera nunha parada determinada.
Consulten os cambios máis salientables e a información completa nos documentos que se achegan.
